ایک وسق ساٹھ صاع کا ہوتا ہے۔ ایک صاع پونے چھ رطل کا۔ جیسا کہ اوپر گزراہے اکثر خیرات اس کے اندر کی جاتی ہے تو آپ نے یہ حد مقرر فرما دی۔ ابوحنفیہ کا یہ کہنا کہ عرایا کی حدیث منسوخ ہے یا معارض ہے مزابنہ کی حدیث کے، صحیح نہیں۔ کیوںکہ نسخ کے لیے تقدیم تاخیر ثابت کرنا ضروری ہے اور معارضہ جب ہوتا کہ مزابنہ کی نہی کے ساتھ عرایا کا استثناءنہ کیا جاتا۔ جب آنحضرت صلی اللہ علیہ وسلم نے مزابنہ سے منع فرماتے وقت عرایا کو مستثنی کردیا تو اب تعارض کہاں رہا۔ حافظ ابن حجر فرماتے ہیں : قال ابن المنذر ادعی الکوفیون ان بیع العرایا منسوخ بنہیہ صلی اللہ علیہ وسلم عن بیع الثمر بالثمر و ہذا مردود لان الذی روی النہی عن بیع التمر بالتمر ہو الذی روی الرخصۃ فی العرایا فاثبت النہی و الرخصۃ معا قلت و روایۃ سالم الماضیۃ فی الباب الذی قبلہ تدل علی ان الرخصۃ فی بیع العرایا وقع بعد النہی عن بیع التمر بالتمر و لفظہ عن ابن عمر مرفوعاً و لا تبیعوا التمر بالتمر قال و عن زید بن ثابت انہ صلی اللہ علیہ وسلم رخص بعد ذلک فی بیع العریۃ و ہذا ہو الذی بقتضیہ لفظ الرخصۃ فانہا تکون بعد منع و کذلک بقیۃ الاحادیث التی وقع فیہا استثناءالعرایا بعد ذکر بیع الثمر بالتمر و قد قدمت ایضاح ذلک ( الفتح الباری ) یعنی بقول ابن منذر اہل کوفہ کا یہ دعویٰ کہ بیع عرایا کی اجازت منسوخ ہے اس لیے کہ آنحضرت صلی اللہ علیہ وسلم نے درخت پر کی کھجوروں کو سوکھی کھجوروں کے بدلے میں بیچنے سے منع فرمایا ہے۔ اور اہل کوفہ کا یہ دعویٰ مردو د ہے اس لیے کہ نہی کی روایت کرنے والے روای ہی نے بیع عرایا کی رخصت بھی روایت کی ہے۔ پس انہوں نے نہی اور رخصت ہر دو کو اپنی اپنی جگہ ثابت رکھا ہے اور میں کہتا ہوں کہ سالم کی روایت جو بیع عرایا کی رخصت میں مذکور ہو چکی ہے، وہ بیع الثمر بالتمر کی نہی کے بعد کی ہے اور ان کے لفظ ابن عمر رضی اللہ عنہما سے مرفوعاً یہ ہے کہ نہ بیچو ( درخت پر کی ) کھجور کو خشک کھجور سے۔ کہا کہ زید بن ثابت رضی اللہ عنہ سے مروی ہے کہ آنحضرت صلی اللہ علیہ وسلم نے اس کے بعد بیع عرایا کی رخصت دے دی، اور یہ رخصت ممانعت کے بعد کی ہے اور اسی طرح بقایا احادیث ہیں جن میں بیع الثمر بالتمر کے بعد بیع عرایا کی رخصت کا مستثنی ہونا مذکور ہے اور میں ( ابن حجر ) واضح طور پر پہلے بھی اسے بیان کر چکا ہوں۔