آنحضرت صلی اللہ علیہ وسلم نے گوہ ( ساہنہ ) کا ہدیہ قبول تو فرمالیا، مگر خود نہیں کھایا، کیوں کہ آپ کو یہ مرغوب نہ تھا۔ ہاں آپ کے دسترخوان پر اسے صحابہ کرام رضی اللہ عنہ نے کھایا جو اس کے حلال ہونے کی دلیل ہے مگر طبعی کراہیت سے کوئی اسے نہ کھائے تو وہ گنہگار نہ ہوگا، ہاں اسے حرام کہنا غلط ہے۔ المحدث الکبیر حضرت الاستاذ مولانا عبدالرحمن صاحب مبارک پوری رحمۃ اللہ علیہ فرماتے ہیں: وذکر ابن خالویہ ان الضب یعیش سبع مائۃ سنۃ وانہ لایشرب الماءویبول فی کل اربعین یوما قطرۃ ولا یسقط لہ سن و یقال بل اسنانہ قطعۃ واحدۃ و حکی غیرہ ان اکل لحمہ ےذہب العطش یعنی ابن خالویہ نے ذکر کیا ہے کہ گوہ ( ساہنہ ) سات سو سال تک زندہ رہتی ہے اور وہ پانی نہیں پیتی اور چالیس دن میں صرف ایک قطرہ پیشاب کرتی ہے اور اس کے دانت نہیں گرتے بلکہ کہا جاتا ہے کہ اس کے دانت ایک ہی قطعہ کی شکل میںہوتے ہیں اور بعض کا ایسا بھی کہنا ہے کہ اس کا گوشت پیاس بجھادیتا ہے۔ آگے حضرت مولانا فرماتے ہیں: وقال النووی اجمع المسلمون علی ان الضب حلال لیس بمکروہ یعنی مسلمانوں کا اجماع ہے کہ گوہ ( ساہنہ ) حلال ہے مکروہ نہیں ہے۔ مگر حضرت امام ابوحنیفہ رحمہ اللہ کے اصحاب اسے مکروہ کہتے ہیں۔ ان حضرات کا یہ قول نصوص صریحہ کے خلاف ہونے کی وجہ سے ناقابل تسلیم ہے۔ ترمذی کی روایت عن ابن عمر میں صاف موجود ہے کہ رسول اللہ صلی اللہ علیہ وسلم نے فرمایا لااکلہ ولا احرمہ نہ میں اسے کھاتا ہوں نہ حرام قرار دیتا ہوں۔ اس حدیث کے ذیل حضرت امام ترمذی رحمہ اللہ فرماتے ہیں۔ وقد اختلف اہل العلم فی اکل الضب فرخص فیہ بعض اہل العلم من اصحاب النبی صلی اللہ علیہ وسلم و غیرہم وکرہہ بعضہم و یروی عن ابن عباس انہ قال اکل الضب علی مائدۃ رسول اللہ صلی اللہ علیہ وسلم وانما ترکہ رسول اللہ صلی اللہ علیہ وسلم تقذرا یعنی گوہ ( ساہنہ ) کے بارے میں اہل علم نے اختلاف کیا ہے۔ پس اصحاب رسول اللہ صلی اللہ علیہ وسلم میں سے بعض نے اس کے لیے رخصت دی ہے اور ان کے علاوہ دوسرے اہل علم نے بھی اور بعض نے اسے مکروہ کہا ہے اور حضرت ابن عباس رضی اللہ عنہما سے مروی ہے کہ رسول کریم صلی اللہ علیہ وسلم کے دسترخوان پر گوہ ( ساہنہ ) کا گوشت کھایاگیا مگر آپ صلی اللہ علیہ وسلم نے طبعی کراہیت کی بنا پر نہیں کھایا۔ حضرت مولانا مبارک پوری فرماتے ہیں: وہو قول الجمہور وہو الراجح المعمول علیہ یعنی جمہور کا قول حلت ہی کے لیے ہے اور یہی قول راجح ہے جس پر فتویٰ دیاگیا ہے اور اس مسلک پر حضرت مولانا مرحوم نے آٹھ احادیث و آثار نقل فرمائے ہیں اور مکروہ کہنے والوں کے دلائل پر بطریق احسن تبصرہ فرمایا ہے۔ تفصیل کے لیے تحفۃ الاحوذی جلد: 3ص: 73,74 کا مطالعہ کیا جانا ضروری ہے۔